Polres Minahasa saat Press Release
Minahasa. Jadi lagi kejadian dan minuman keras (miras) jadi depe penyebab utama kong jadi kasus pembunuhan. Ini kali jadi di Desa Kayubesi, Jaga II, Kecamatan Kombi, Kabupaten Minahasa.
Depe korban nama Michlan Lantang (39), kong depe pelaku berinisial RW alias Rendi alias Kentung (21), dorang dua tinggal bakudekat.
AKBP Tommy Bambang Souissa, SIK, Kapolres Minahasa bilang di acara bakudapa deng pers, Selasa (10/08/2021), kasus ini da jadi pertama tu korban deng tu pelaku deng dorang pe tamang nama Ando da beking acara minum cap tikus di rumah Spenser Ponggawa, hari Senin (02/08/2021) sore, kira kira jam 18.00 Wita.
Kong sampe malam korban deng pelaku deng dorang pe tamang tamang pindah di perempatan jalan kampung. Disana dorang lagi kase trus ba minum cap tikus. Ditampa itu kong korban deng pelaku baku salah paham.
Pelaku pukul tu korban, karna nda trima dapa pukulan, korban langsung babalas. Kong akhirnya dorang baku tumbu disitu. Nda lama dorang ada bakalae disitu karna ada spenser yang kase pisah pa dorang.
Lanjut tu cerita kong hari Selasa (03/08/2021) tenga malam sekitar jam 01.00 Wita, waktu korban, Spenser deng tersangka pulang, korban bilang dia nda terima dapa pukulan. Pelaku langsung ba marah kong dia pukul ulang pa korban sampe dua kali. Korban waktu itu nda ba balas kong dorang samua pulang. Pelaku ternyata bajalan di muka kong singgah pa depe rumah kong ambe piso kong dia dola tu korban, mar tu korban deng depe teman Spenser nda perduli akang cuma ba trus bajalan pulang.
Mar ternyata korban da ba simpan depe marah. Tuama yang depe kerja hari hari ba tani ini ambe peda dan datang cari tu pelaku pa depe rumah.
Waktu dia dengar korban bataria pangge depe nama pelaku langsung emosi kong ambe peda deng piso kong dia kaluar pi bakudapa deng korban. Kong akhirnya jadi, dorang dua bakalae samua ada pegang barang tajam.
Kapolres Minahasa AKBP Tommy Bambang Souissia, SIK deng Kasat Reskrim AKP Edy Susanto deng Kasubag Humas Iptu Robin Langi yang ba dampingi, kase tunjung barang bukti tu piso deng peda. Kong tu pelaku dapalia ada di belakang deng anggota Propam ja jaga.
Lanjut penjelasan, saling potong rupa ja lia di film jadi. Akhirnya korban deng pelaku jatuh, saat dong dua jatuh pelaku deng cepat badiri kong tikang korban dibagian punggung.
Klar dia tikang pelaku datang pa korban pe mama kong bilang tu korban dia so tikang so badarah dan lebe bae bawa jo ka rumah saki. Kong pelaku langsung lari kong tu korban langsung dorang kase lari ke rumah saki Sam Ratulangi Tondano.
Pe dengar ada kasus pembunuhan di desa Kayubesi, tim Resmob Polres Minahasa langsung ba gra kumpul data, deng dusu tu pelaku. Depe hasil pelaku ditangkap delapan jam kemudian di Manado, di ruas jalan Sam Ratulangi.
Kapolres da tegaskan, saat ini pelaku so tahan kong mo kena pasal 338 KUHP, subsider 351 ayat 3 KUHP dengan ancaman mo hukuman maksimal 15 tahun penjara.
Kasubag Humas Iptu Robin Langi ba tambah bilang da jadi ni kasus pembunuhan yang beking korban ML mati depe penyebab paling awal karna minum minuman keras sampe jadi dorang bakalae pake senjata tajam. (Hence Karamoy)
.jpeg)
.jpeg)
