Minahasa - Da beking di rumah Tonaas Tondano di kelurahan Tounsaru tu hari Rabu(8/9/2021), tu orang orang kawanua yang parduli tu kemajuan daerah beking acara bacerita sama sama dengan tu generasi muda dan LSM. Dirumah dari Lucky Lexy Kalonta itu yang nanti kata mo jadi museum Minahasa. Yang kase pangajaran Tonaas Brigjen Purn. Edward Pakasi da kase tu nilai nilai deng tujuan Permesta, juga ada Noldy Mandang deng Wenny Paath tentang tu orang Minahasa diluar pe brani deng pe jago. Adaley yang kase tanggapan di vicon itu ada ibu Kolonel Rumbayan, Prof. Parengkuan deng tu laeng.
Sementara tu om Edward Pakasi bilang tentang perjuangan Permesta. Depe nilai nilai deng tujuan permesta yang ada di piagam permesta itu yang jadi pokok yang dia ada bilang di acara bacirita itu. Perjuangan Permesta itu baru dapalia di samua tampa di Indonesia mulai jaman Presiden RI ke-7 Joko Widodo, bahwa nilai nilai dari tujuan gerakan perjungan Permesta NKRI itu baru dapa lia.
"So jelas dari depe tujuan, Permesta bukang pemberontak atau makar for mo ba pisah. Kase merata tu pembangunan bukang cuma di Jawa dan dapalia samua di jaman Presiden Joko Widodo, "Mantan Wakapolda Sumut ini bilang. Dia kase tambah tu kase lurus sejarah permesta so tatulis di keputusan Presiden RI Soekarno No. 322 tahun 1961 tentang pemberian Amnesti deng Abolisi for tu pengikut gerakan permesta juga melalui Kebijakan Presiden RI Joko Widodo deng Wapres Jusuf Kalla melalui KepMenkumham No. AHU 0032401 AH 01.07 tahun 1916 tanggal 16 Maret 2016 tentang pengakuan kalo tu gerakan Permesra for kepentingan kesejahteraan semesta rakyat Indonesia.
Waktu diskusi peserta juga da ba tanya tu kurangnya persatuan orang orang kawanua asal Minahasa sebab yang ada bukang baku beking pande mar baku tunjung pande dan setiap ada acara bakudapa pertama selalu agak kaku. "Torang yang muda butuh yang ja lia dari depe cara hidop, cara bicara deng kalakuan deng budaya bae yang perlu kase ajar pa ade ade, "Hence Karamoy bilang.
Acara bakudapa bacerita ini bagus skali mar yang penting ja harap akang bagimana mo kase bagus ni Minahasa deng Sulut dimana depe warga yang hidop di daerah deng di luar da hidop deng bersatu jadi Mina Esa di satu pikiran, perasaan deng tindakan ba gra sama deng tu tong pe budaya mapalus deng tu slogan si tou timou tumou tou yang banyak skali pesan for kemajuan deng kesejahtraan tu warga kawanua. I jajat u santi (Hence Karamoy)
.jpeg)
.jpeg)
