MINAHASA - So nda lama kurang 31 hari lagi tu PON XX PAPUA somo beking. Karna barasa sebagai orang Minahasa Sulut biar so lama di Papua mar tu rasa sayang tetap for SULUT. Sondor mo bilang ley tetap dorang mo dukung tu atlit Sulut. Tu PON Papua ini so lama dorang orang orang Kawanua di Papua da tunggu tunggu.
Depe ketua DPD KKK Papua Jory Lumingkewas, SE bilang kalo dorang ba dukung tu PON da beking di Papua dan siap mo bantu pa warga Papua mo kase bagus dan sukses mar untuk dukungan komang dorang tetap pa atlit atlit dari Sulut.
Jory bilang memang dorang da tinggal deng mancari di Papua dan ba dukung tu kegiatan mar untuk mo ba dukung ya dorang akan lebe ba dukung pa orang orang dari kampung halaman Minahasa/Sulut yang da ba lomba di samua kota deng kabupaten di Jayapura, Sentani, Merauke deng Timika.
Karna dia tu ketua KKK Papua Jory Lumingkewas bilang dia so kase bilang pa orang orang kawanua di Papua yang tinggal di Jayapura, Sentani, Merauke deng Timika for mo sambut deng ba dukung akang pa Atlit atlit dari Sulut.
"Disamua kita ada banyak orang orang kawanua dorang so siap mo sambut deng dukung supaya tu atlit Sulut bole dapa juara, " Jory bilang.
Jory yang ketua BMI Papua ini ley ba tambah bilang kalo dia mo ba bilang pa atlit deng official tim deng orang tua atlit supaya jang kuatir karna dorang orang kawanua so siap mo bantu apa saja for tu atlit deng orang orang dari Sulut yang iko ini PON.
Kong tentang tu kabar nda bagus tentang tu keamanan acara PON ini yang orang orang nda ada ontak ja kase sebar Jory bilang nda usah ja dengar itu. Karna depe kenyataan ada TNI deng POLRI yang so kase jaminan mo ba jaga supaya ni PON bajalan bagus sampe klar.
"Kita ley da kase tau for atlit atau ofdicial kawanua ada perlu di tiap kota so ada ketua deng pengurus kawanua yang bole dihubungi jika ada yang perlu bantuan, "Yory bilang.
For info yang bole dihubungi atlit deng ofisial Sulut diantaranya, kota jayayapura Ketum Bpk. Drs. Johan Kawatu MSi. HP 0811 482 367, Kota Sentani, Ketua Bpk. Stenly Tewal HP 0811 480 9711, Kota Merauke Ketua Bpk. Johan Paulus SH. HP 0823 9904 8008, Kota Timika, Ketua Ibu Sherly Lumenta SE. HP 0822 1170 7009, Provinsi Papua, Ketua DPD Bpk. Jory Lumingkewas, SE, HP 0812 3503 1045.
Di akhir ba cerita di hari Selasa(1/9/2021), Yory Lukingkewas kase inga kalo ini kegiatan pasti ada depe kekurangan, sebagai orang Sulut yang juga sayang Papua karna dorang tinggal deng so menyatu di Papua Yory bilang maklumi jo tu kalo lia tu kekurangan. "Torang ba harap Sulut dapa juara di banyak kegiatan deng berhasil bole lebe dari target yang Gubermur Oly Dondokambey pe suka, "Yory ba kata.
Mari torang orang kawanua dukung deng kase sukses tu PO N XX Papua. Semoga SULUT bole dapa banyak juara. (Hence Karamoy)
.jpeg)
.jpeg)
